Centos de crianzas achegáronse onte ao Campo da Festa de Lestedo para gozaren da Festa da Filloíña, nunha tarde chea de música, xogos, Xenerais da Ulla e Concurso de Disfraces infantil. Con esta xornada estrenouse o programa da XLI Festa da Filloa, que celebrará o seu día grande o vindeiro domingo 18 de febreiro.
A Festa da Filloíña deu comezo cunha sesión de xogos tradicionais para as crianzas asistentes. A continuación, ofrecéronse actuacións de distintos grupos musicais da Asociación Cultural Mestre Manuel Gacio, aos que seguiron Os Campiños de Sarandón e as Travesas de Codeso. Crianzas e maiores demostraron que hai canteira para cunhas actuacións que combinaron a música e o baile tradicional galego.
![ACMestreManuelGacioFilloiña](https://www.festadafilloadelestedo.gal/wp-content/uploads/2024/02/ACMestreManuelGacio-1024x635.jpg)
Seguidamente, chegou o momento da apertura oficial da celebración, co pregón, que, nesta ocasión, correu a cargo do alumnado de 4º EP do CPI Antonio Orza Couto. As nenas e nenos salientaron a importancia do Entroido tradicional da Ulla, o delicioso sabor das Filloas de Lestedo (cos seus variados recheos) e animou ao público a gozaren todas as celebracións incluídas no programa desta cita anual.
![PregonFestaFilloiña](https://www.festadafilloadelestedo.gal/wp-content/uploads/2024/02/Pregon-1024x649.jpg)
Entre aplausos e vítores, deuse paso aos seis atranques dos Xeneraliños e Xeneraliñas da Ulla. Lila, Anxo, Yaiza, Aitor, Antía, Nico, Martina, Enzo e Andrés fixeron rir cunhas coplas que satirizaban sobre temas de actualidade e sobre a rivalidade entre parroquias, tanto de Boqueixón -Lestedo e Sergude- como de Vedra -Sarandón e San Xulián-. Mais todas as batallas dialécticas finalizaron coa intención de asinar a paz tomando unhas Filloas de Lestedo, así como cos vivas pola Festa da Filloíña e por Boqueixón.
![XeneralinhosDaUllaFilloiña](https://www.festadafilloadelestedo.gal/wp-content/uploads/2024/02/Xeneralinhos-1024x609.jpg)
Preto de 50 propostas
Como merenda, desde a organización ofreceuse unha degustación de filloas doces para as crianzas, que fixo as veces de antesala para a celebración do Concurso de Disfraces Infantil. Foron preto de 50 as propostas de disfraces, tanto individuais como grupais, presentadas a este certame celebrado no Campo da Feira de Lestedo.
![PrimeiroPremioGruposConcursoDisfracesFilloiña](https://www.festadafilloadelestedo.gal/wp-content/uploads/2024/02/PrimeiroPremioGrupos-1024x614.jpg)
Unhas coloridas propostas que foron valoradas por un xurado composto por tres mulleres da Asociación Veciñal de Lestedo. Entre os aspectos máis valorados, e que foron determinantes á hora de nomear os disfraces vencedores, atopáronse a orixinalidade, a posta en escena e o traballo artesanal requirido para a súa elaboración.
Desde o xurado recoñeceron que “foi moi difícil chegar a un veredicto”, xa que había moito nivel entre as propostas. Finalmente, as vencedoras da sección grupal foron Sargadelos made in Boqueixón, que obtiveron un primeiro premio en metálico de 250 €, e Os Marcianos, que polo seu segundo posto levaron 150 €. Xa na categoría individual, gañaron O Cosmonauta, que quedou en primeiro lugar (premiado con 100 €), e o Camera Spekaer 100% orixinal, cun segundo premio valorado en 50 €. Desde a organización amosaron a súa satisfacción pola alta participación neste concurso e agradeceron o esforzo realizado polas persoas participantes en encher a Festa da Filloíña de orixinalidade e frescura.
![PrimeiroPremioIndividualConcursoDisfracesFilloiña](https://www.festadafilloadelestedo.gal/wp-content/uploads/2024/02/PrimeiroPremioIndividual-1024x797.jpg)
E para pechar esta completa xornada festiva, o Campo da Festa de Lestedo acolleu un concerto de Uxía Lambona e a Banda Molona. O grupo fixo mover as cadeiras a crianzas e familiares ao ritmo da súa divertida música, nunha actuación na que non faltaron éxitos como Un soño é ou Esto báilase así!